Una botella d'agua enllena de tierra vivo

XXXI Selmana de les Lletres Asturianes.

Esti añu, la 31 Selmana de les Lletres Asturianes cellebrase en homenaxe al escritor Xosé Antonio García, (Mieres – 1961/1997). Escritor mui representativu del periodu del Surdimentu, que desendolcó una intensa actividá cultural, collaborando en revistes lliteraries, periódicos y programes de radio. Publicó dos llibros de poesía 'Cuartetu de la criación' y 'Alcordances d'un home muertu', nos que muestra, con estilu figurativu y esistencialista, sus pensamientu sobre la condición humana y la muerte.

L'ampliu programa de la Selmana, ye mui participativu, con munches actividaes, vesites d'escolinos, inauguración d'un placa col nome del Xosé Antonio, homenaxe a los ganadores del premiu 'Teodoro Cuesta', emisión pola RTPA del programa 'Nomes d'Asturies', dedicáu a la vida del homenaxeau y el día 7 , día de les lletres asturianes, la celebración de actos institucionales, nel Auditoriu de la Casa la Cultura de Mieres y el Teatru Campoamor de Uviéu.

Nesta edición, la Xunta Xeneral del Principáu collabora cola edición de un llibru de microrrellatos que, col títulu "Una botella d’agua enllena de tierra vivo”, – versu del poemariu Cuartetu de la Creación -, en pallabres de la Presidenta de la Xunta, "quier abrir una reflexón acerca de la nuestra actitú, la de la especie humana, al respective del planeta que nos abelluga nesti 2010, Añu Internacional de la Biodiversidá”.

Nel actu institucional que cellebramos güei, en la Xunta, munchos parllamentarios y cabezaleros públicos, dimos llectura de testos n'asturiano. Yo, escoyí lleer el microrrellatu que lleva por títulu EQUILIBRIU, ya que paezme mui axeitáu pol asuntu y l' intre.

Avanzó col garrote na mano, nin siquier tuvo menester d’escondelu. La foca esperábalu tranquila, cuasi amigable. Por qué tener mieu d’un compañeru col que se comparte la Tierra. Y anque entá nun cumpliere los tres meses y nun tenia idea clara de que yerá la vida, supunxo qu’aquel ser bípedu qu’avanzaba hacia ella venía a saludala. El güelpe enllenóla de sangre, pero nun la mató. Llástima, porque lo que vieno depués foi peor. Y mientres ella algamaba, por fin , a dexar esta vida y colar pal cielo de les foques, enun llugar lloñe d’ellí, llamáu Wall Street, la Bolsa xubía un poco más.

Notes:
Bibliografía: Xosé Antonio García,'Cuartetu de la criación' (Casa de Cultura Teodoro Cuesta, 1989) 'Alcordances d'un home muertu' (Editora del Norte, 1995).
Vicente Garcia Oliva. Equilibriu. Colección de microrrellatos. “Una botella d’agua enllena de tierra vivo”.
Imaxen: Cartel del Día de les Lletres Asturianes.

Tengo cincuenta años, nun ta nada mal, ¿Verdá?.

Un añu más y van treinta, celebrose n’Asturies, nestos primeros dies de Mayu, la Selmana de les Lletres Asturianes, dedicá n’esta ocasión a la escritora Enriqueta González Rubín, “qu’a mediaos del sieglu XIX abrió un camín ensin vuelta que diben siguir munches muyeres y homes: el camín de la igualdá”.

Asina, a lo llargo de tola selmana, Llunes, 4 – Vienres, 8, desendolcose un programa d’actividaes polos conceyos de Llanes, Ribeseya y Uviéu, (presentación de llibros, esposiciones, premios lliteraios, llectures de testos, etc)

Como ya ye vezu, la Xunta Xeneral del Principal d´Ásturies collabora con la edición de un llibru, de microrrelatos de varios autores, n’esta ocasisión titulau ”Caminos que nadie triara” y cola llectura pública, nel Salón Europa, de testos n’asturianu por parte de representantes políticos e institucionales.

Pala ocasión escoyi un testo de Lourdes Alvarez (L’Agüeria Urbíes, Turón- Mieres, 1961) dedicaú a Elisa “Tengo cincuenta años, nun ta nada mal, ¿verdá? y que yo en reconocimiento lo faigo coles muyeres de mi xeneración.

Cocinera, llavandera, auxiliar d’enfermeria, cuidadora, amante (quien ama, amaba o amando), peluquera, economista, mediadora, mecanógrafa, enseñante y un llarguisimu etcétera d’ oficios desempeñé nestos cincuenta años que tengo.

Hai unos meses, el que foi’l mio home, decidió que nos separtáremos y – eso si – quedé na casa que nun niego seya un actu de xenerosidá, ordenáu pol xuez, y namás.

La mio experiencia llaboral ta certificada nel silenciosu archivu onde crié los fíos, complací al home y curié de los mayores. La llave ferruñenta yá nun ye a abrir esi archivu.

Llevo tres meses ensin parar buscando trabayu, magar me sienta viva, con ganes de salir p’alantre, pa ninguna empresa soi afayadiza; tengo cincuenta años, nun ta nada mal, ¿verdá?.

Pa finalizar, felicitar a tolos que con su trabayu y conocencia arriquecen la nuesa llingua, un patrimoniu cultural primerizu que debemos curiar con ciñu, engrandando so difusión y favoreciendo su deprendimientu y usu por los/as asturianos/as.

Si la mesma dureza del silenciu.

N'Asturies, como ya ye vezu a primeros de Mayu (Llunes, 5 – Vienres, 9), conmemorose la Selmana de les Lletres Asturianes.

Nesta XXIX edición que tuvo como protagonista a l’autora Maria Teresa González, exposigose un ampliu programa d’actos, ( esposiciones, presentación de llibros y llectures de testos, etc) nos que participó el Parllamentu d’Asturies cola edición del llibru, “Sentir que toi viva”, dedicau a la muyer y cola llectura pública nel salón Europa de testos en’asturianu.

Como nesta ocasión nun pude, como otres veces, lleer el testu que me correspondía nel actu institucional, paezme bien nun perder la oportunidá d'engolalu aquí.

SI LA MESMA DUREZA DEL SILENCIU

Si la mesma dureza del silenciu
manca,
como bisarma qu’acute nel suañu,
y l’odiu
embaxo la carne
remanez como fonte,
hasta vertise en ríu,
y mos arrastra.

Si en cada abrazu
son dos manes de fiera
gatuñando,
dos ermos qu’amorrecen de sede
tres la pulpa xugosa de los llabios.

Si somos dos cadarmes
qu’atropaos nel deséu
se taracen,
por qué buscanos tanto
amor,
si mos facemos dañu.

Una selmana na que nun resulta añaciosu, pa mi, facer un fuelgu n'actividad diaria pa camentar sobre la situación actual del asturianu, contribuyendo a so difusión en internet y manifestar mi sofitu al desarrollu de la Llei d’usu y Promoción del Asturianu.

Dicho esto, y col mismu énfasis dicir que nun comparto pa ná el camientu d’aquellos qu'usen la llingua asturiana como un preséu políticu pa criar falses identidades qu’esperdiguen a la sociedá asturiana, pende camentu que, la nuesa llingua ye un fechu cultural primerizu, patrimoniu de toos, que debemos curiar con ciñu, engrandando so difusión y favoreciendo su deprendimientu y usu por los/as asturianos/as.

Morea, Pueblu, Sociedá y Xente Exemplar.

Ayer foi un día plenu, pal pueblu de Morea d´Ayer y los Humanitarios de Sanmartín, ya que recibíen de manes del Príncipe d´Asturies el premiu al pueblu exemplar d´Asturies. Mereciu reconocimiento a un pueblu trabayaor y tenaz en pruñar por pertener meyores condiciones de vida y a una sociedá, más que centenaria, que dende los sos inicios tuvo un carácter solidariu y de respetu pola cultura tradicional.

Nun ye de estrañar pués, que al actu asistieran brañada de vecinos de Morea y de tol conceyu d´Áyer y nun pocos avecindaos perhí afuera que siguen xuncios a la villa de Morea. Asina, en cuanto llevantó la nublina matutina y el sol aprucir axuntáu al Picu Moros, la plaza de l´iglesia y les cais d´alrededor llenáronse a corrompinar de xente, mentantu les bandes de gaites llaraben l´aire de notes musicales y los grupos de baille daben color al festexu.

Los actos, asocediéronse a tolo llongu de la mañana, onde los príncipes y la xente protagonizaron munchos xestos cenciellus y candiales, que güei recoyen de xeitu ampliu los medios de comunicación. Foi un día de falar muncho cola xente, d´atopase con amigos y collacios, algún dellos facía años que nun lo veía y sobre to d´alcordanzas.

Morea ye pa mi, dende siempre, la sorrisa de mi güela Asunción y el llugar d´algunes de les meyores alcordanzas de la neñez. Con abondo señardá, vienme a la memoria, la casa de Sotiello, a la que s´entraba por un escuru caleyu empedrau, por tres aprucibase el corredor, a plena lluz, a la cai de l´estación.

Naquel corredor pase hores falando con mi güela o empericotau a una siella pa ver con plasmu les asorantes máquines de vapor, basnando un sin fin de vagones enllenos de carbón, mentantu más allá, les vagonetas de la mina nun paraben de movese d´aquí p´alla pol pozu San Antonio, que a menudu ruxía sordamente, faciendo tremer el vasar y tintinear los vasos decoraos con dibuxos de catives florines.

Los paseos con mi güela, anque cortos, nun apiancabamos demasiao, hasta el campu futbol, la plaza, les colomines o el ponte la casanueva pa ver a la familia, parecienme mui llongos, pues parábala muncho la xente, muyeres y homes, pa falar, preguntai coses y faceme a mi afallagues. Yo, sentíame mui a gustu a su lau, pues veía que mi güela era una muyer mui bona y emponderada pola xente.

Cuando falaba con mi ma d´estes coses y otres de cuando ella era neña, sosprendiai muncho que trescurriú tantu tiempo recordarai con tanta claridad a su ma, pues yo tenía pocos años y pasé escasu tiempu con ella. Ya desde entós, nun me cabu dunda que mi güela Asunción yera una muyer almirable.

Depués de finar mi güela, torné varies veces a Morea, pasando les temporaes de branu nes cases de la familia, d´esi tiempo son los trebejos colos primos na cai, xugar al fútbol, coyer tritones, cazar grillos y camparines, afristar piedres al ríu, apiancar de folixa y parranderu poles fiestes de prau y sobre to na foguera de san Xuan,. to ello, ye una bona parte de los meyores intres de la mi neñez.

Col pasu de los años y falando con persones que tuvieron tratación con mi güela, conocí de su cuayu pa´enfrentáse a la vida. Vilba de un fusilau por defender la República, con ocho fios, pruñó sin desmayu pa sacalos p´alante y pese a que durante munchos años tartió dañu, injusticies y llaceries, siempre retruco faciendo el bien a tol mundu.

Por ello, agora, cuando la sociedá Humanitarios de Sanmartín y el pueblu de Morea reciben el premiu al pueblo exemplar d´Asturies, paezme una bona ocasión pa través d´estes línies rindir un xustu, cenciellu y candial homenaje a quien tola vida foi una muyer ayerana exemplar. Mi güela Asunción.

Más que música.

El canciu y la música asturiana tan aflorando cada día con mayor rixu nes abondes actividaes culturales y festives que se celebren n’Asturies. y fuera della y que nestos meses de branu algamen, nel ámbitu de les musiques tradicionales, tou su esplendor.

Asina, a la brañada de fiestes de prau, hai qu’añadir cuasi a diariu munchos conciertos y festivales folklóricos que tienen como principales atraybles el baille y les músiques tradicionales. Nesti mes d’agostu, podemos alcontrar eventos mui importantes en Xixón, Tapia, Avilés, Tinéu, Santolín d'Ibias, Navia, Candamu, Llanes, Pola de Somiedu, Navia, Campu Casu, Ribeseya, Sotrondiu, Baiña, Porcia, etc. a los qu’acurren miles de persones, munches delles, mozos y moces bonos conocedores, cuando non practicantes activos, d’estes artes.

Güei, les bandes de gaites comparten protagonismu con les bandes de música folk qu’arríquecen la música tradicional asturiana con “vieyes y nueves sonoridaes” xenerades con instrumentos ( acurdión diátonicu, vigulin, ruxidera, panderu, castañueles, rabel de tres cuerdes, payella, zanfoña, etc, ) más o menos encontrollados y dellos que agóra faen un usu mui frecuente.

Hai qu’añidir, les muestres de folklore y concursos de canciu asturiana que se celebren, como yá ye vezu, durante to’l añu y que tienen como puntu cimeru a l’asturianada o “toná asturiana”. Un xénero liricu que yá entamó’l relevu xeneracional con ésitu y n’onde ye apalpable, dientro d’un ampliu abanigu de bones voces y estilos, la esistencia d’interpretes femenines y masculinos col más altu nivel.

Too esti panorama, permitenos achisbar un futuru mui prometedor pa la música asturiana. Atrás quedó’l tiempu en que nuesa música tradicional era tratá cuasi siempre como un fechu festivu e inclusu sujetu a frases más o menos despectives “depués de vieyu, gaiteru” y qu’apenes era valoratible pola cultura oficial, que les más de les vegades usabala como arma afrelladiza frente a cultures estranxeres.

Polo que nun ye añaciosu memoriar que cuando nos años setenta se despellen nueves condiciones polítiques y sociales n’España, n’Asturies dá comencipiu el reverdecimientu de nuesa cultura tradicional, xurdiendo nuevos compositores y cantantes, qu’amás usen paello la llingua asturiana, xenerando na xente un gran afoguin pola gaita, tambor, acurdión, etc qu’alcuentra una rempuesta positiva nos nuevos ayuntamientos democráticos, qu’anque ayunos de competencies na materia y escasos de recursos económicos nun duldaron en prestar sofitu a tan meritoria xera.

Anguañu, p’atender el medría de la demanda de places pa estudiar nes escueles de música tradicional, vemos qu’aquelles iniciatives se estienden pola xeografía de munchos conceyos asturianos y gracies a la llabor de la escuela d’asturiania a los centros asturianos del esterior y que tamién s’abarquen otres facetas como les bandes de gaites, grupos de bailles y la colaboración, patrociniu y organización de certámenes de folklore y concursos de canciu asturiana.

Nesta nueva realidad, de nós depende, qu’en vegada de encerrizanos n’alderiques baterizos sobre cuestiones tarrates de la llingua asturiana, sepamos aprovechar nesti intre la oportunidá de puxar fuertemente les polítiques culturales que bramente conciten el respaldu unánime de los asturianos.

Nesi sen, paezme necesario facese eco de la opinión de persones vinculaes a la música tradicional d’que ye imprescindible potenciar los trabayos d’investigación y recopilación del ingente patrimoniu musicológico asturianu y ampliar l’enseñu de la música tradicional,, dicho too ello sin el pruyimientu de orientar a quién debe de llevar la batuta, pues pa ello alcontrará meyor criteriu en maestros, profesores y espertos musicales.

Nun mundu globalizau y cada vegada más mediáticu, anovador y en demanda continua d’amplies “novedaes” musicales y siendo’l canciu y la música tradicional asturiana señes d’identida y de distinción dientro y fuera d'Asturies, puede ser l’entre y tamién una bona oportunidá pa nesi entornu músical “criar una fábrica” de contenidos audiovisuales que sea un arime más pa fomentar la cultura asturiana y un sofitu pa xenerar más actividad económica y emplegu .

El retu, agora, ye saber afrontar con claror d’idees y aceñu la importante llabor de facer mui accesible a la ciudadanía y poner en valir esta doyura cultural.

La foguera de San Xuan

El cabezaleru del conceyu d’Uviéu, tan charrán y gallasperu na campaña electoral, tornosenos agora tan cenciellu y aforradizu, que s’encerrisco en quitanos la foguera de San Xuan, con el probe pretextu de que metía un ruíu del degorriu que fadiaba a tolos vecinos del Cascu Antiguu.

Y fizolo el mismu que, anguaño y agora, nun pon galga a los ruios y vociaes al "altu la lleva" que, toles nueches de fin de selmana nun dexen descansu a ningun vecín del barriu.

Mentantú el concejal del ramu, calla como un afogau, seguramente enfastiáu con el xigantescu panchón que recibe del arrogante Poncio Preboste, arramblando pa ello con un abondo pellizcu de los diezmos y primicias con que esquilma sin escrupulu a los ovetenses.

Güei, nun hai foguera en Uvieu, eso si, haila en tos los llugares d’Asturies y en mediu mundu.

Agora nun cabu dulda . ¡ Existe el cercu a Uvieu!.

Bueno collacios, siempre nos quedará la alcordanza, otros años y llugares, pero ni un rinconín nella pa quienes en nadria, naide recordará habelos votao.

Nel cantu la memoria

Güei na Xunta, como ye davezu por estes feches, celebramos un actu, dientro la programación de la Selmana de les Lletres Asturianes, nel que varies persones, (escritores, diputaos, , etc) damos llectura a testos lliterarios n'sturianu.

Del llibru Cuentos Minimos, editau por la Xunta, tocome lleer "Vida" de Xurde Alvarez. (Llangréu 1073).

Aquel día diba ser el más feliz de la so vida. Enriba la mesa l´escritoriu, tenía´l primeru de los diarios onde ilusionáu, enzarraría y abrazaría los díes recibíos y nel pasáu vivíos. Nerviosu, temblosu`l pulsu y les ganes, punxo nel encabezamiento la fecha d`anguaño y escrbió na primera les páxines: "Nací un 15 de Xineru de 1973". Llueu, quiso siguir y nun pudo. Pensó con fuercia, echó un tiempo ente vacíos, y depués de preñar un desesperu que cortexaba a la derrota terminó añadiendo: "Más... más nada".

Soltó`l pesu de la pluma, peslló la inutilidá fecha diariu abriendo al empar la de la so esistencia y en silenciu, desenterró de la so mirada un puñáu de lluvia d`un cielu de llárimes.
Aquel día, aquel día fue`l más infeliz de la so vida.

Mentantu lleía, allí tabes tú, envuelta en metá de la borrina, difuminando el negruzco de les lletres, que a dures penes podía ver, faciendome sentite tan cerca, como ya fai un año.

Gracias má.